2008年1月18日星期五

跳出框框展所長 乖仔難做

很高興接到編輯的邀請,寫對第四代人的觀感。

我生於八十年代, 成長於80-90年代的黃金時期,享受了殖民地政府的九年免費教育,成長過程中參與港人追求民主自由的七.一遊行。

學習多元化 不如上一代?

我這代人,是從電視媒體中認識八九民運的,唸中學時正值香港移民潮,家境不錯的同學都舉家移民或被送往外地升學,那時港人認為香港的前景很不明朗。我則在此受盡會考和高考的折磨,然後入讀嶺南大學唸社會科學系。畢業後,即投身航空業,迄今已四年多了。工作雖與我熱愛的寫作無關,不過,日常的所見所聞對我皆有裨益。

坊間有不少書藉在談論我這一代人,我這一代,卻在談論下一代的人,循環不息。一代不如一代,是普遍的批評。然而事實可是如此?我們不像第一、二代的人般單純直接,亦不像他們只會恰如其份地扮演角色。這一代人要跳出框框,發展所長,是知識也是智慧型的轉變。很多人評我們功利主義,補習、唸書、學多種語言和培養興趣等皆為了日後在工作上取得絕對優勢。然而,這種觀念可是上一代人──假如不是我們的父母,也會是師長,更甚的是整個社會的氛圍同化我們的思想。

機會看似多 空間卻變小

從就業的角度來看,上兩代的人,書唸得好,工作做得妥當,就已被視作精英,較容易在職場中上位,資質次一等的,單憑拼摶辛勤都能謀得一職養活一家。然而我這一代人,機會看似多了,但社會流動的空間卻越見狹小、競爭更見激烈,不信?可以從招聘廣告的內容作詳細比較,以往的僱主,在招聘廣告上列出的是要求,如今已演變為苛求或奢求。試替我們想一想,一個年輕人怎可能同時獲得學士學位、精通三種語言或以上、熟練操作行內電腦作業系統以及有兩至三年的相關工作經驗?這不是苛求,是甚麼?所以我這一代人,不能只活於勤奮好學有目標的乖孩子既定框架裡,而是要跳出框框,把自己獨有的潛質發揮出來,才是唯一出路。你說,我們這一代人,難做不難做?

28 則留言:

暗黑的卡夫卡 說...

我們這一代資源比以前多﹐競爭對手比以前多(中國+印度已經可以打殘你!)﹐需要的實力也比以前多。

"要跳出框框,把自己獨有的潛質發揮出來,才是唯一出路。"
同意﹐因為市場轉變得太快。之前電腦﹐然後會計﹐後來法律..."今朝好潮﹐聽朝食蕉"。與其讀完電腦做Sale屎﹐倒不如去讀完歷史做Sale屎。只是如果我們的潛質沒有市場價值呢?如果想做作家?藝術家?而且我們由小到大都係"重理輕文"﹐根本無機會發掘那些潛質...

代代都有本難唸的經。我們這一代﹐大概是資訊爆炸與全球經濟底下的二十一世紀"跑圈老鼠"吧。我們可能跑得更快更遠﹐但亦因此跑得更辛苦...

匿名 說...

很多人評我們功利主義 <--- "不肯吃苦頭"先至係主要原因....

匿名 說...

小汀說這一種廣告吧:

1. 持有本港電腦科學、資訊科技或相關學科的高級文憑、副學士、大學學位,或同等學歷;
2. 香港中學會考中國語文科及英國語文科 (2007年前之“課程乙”)成績達第二等級(即2007年前之“E級”)或以上,或同等學歷;
3. 具備一年全職相關資訊科技工作經驗;
及 4. 以客為本,能在壓力環境下工作,並願意在正常辦公時間以外逾時工作,或間中按需要隨時候召工作。

系統開發方面的特定工作要求
5. 具備使用下列工具及技術以編輯、管理和維持網站的實際經驗:微軟視窗(2000/XP/Server 2003)、MS IIS、HTML、JavaScript、Photoshop及Flash(包括ActionScript);

6. 具備使用下列程式編製語言的實際程式編製經驗:ASP/ASP.NET、Java、JSP、VB、XML及SQL;及 7. 具備使用下列軟件及技術開發系統的經驗或良好知識者更佳:Acrobat 8、OOM/UML、RAD、Oracle、MS Access、MS SQL Server、MySQL、Apache、Tomcat、Perl、Unix (Solaris/Linux/HP-UX) 及網頁內容管理系統。

9. 具備五種或以上下列技術的廣泛知識:個人電腦硬件(桌上電腦及手提電腦)、Windows XP、Office XP、Windows 2003 Servers、LAN╱WAN技術、Wireless LAN、IBM Lotus Notes、Blackberry、IP網絡電話及Norton Ghost;

10. 熟悉Lotus Notes應用開發及╱或系統管理將獲優先考慮;及 11. 性格隨和,具良好電話禮儀,樂於助人,友善及有耐性。

這是政府招聘廣告,開12-17k,這不只苛求或奢求,是有病。

匿名 說...

哈哈哈...你唔係行內人,你唔明姐...
其實佢係請緊個junior IT support, that's all.

Kris 說...

想避開痴孖筋的招聘條件,最好的方法是創業,不需任何個人素質,懂用腦袋就好。但可惜沒多少人有這個guts,又有任花的本金。創業難,還不是要向苛刻條件低頭。除非有貴人贈你一條生路,工作走上門找你罷。

leonablogspot 說...

我看小汀的文章時,最有共鳴的,正是那個招聘廣告!
Galileo你張貼這一個,更誇張...
什麼?只是一個junior?
這樣說來,我公司的IT support同事咪好勁?
咁做Editgrid的朋友咪好勁勁勁?

kris,無奈的是,努力"增值"以迎合這些痴孖筋條件者,大有人在

C 說...

卡夫卡:

資源比以前多嗎?資訊或許是的,甚至有氾濫的情況。對於你所說"今朝好潮﹐聽朝食蕉",絕對是香港的寫照,也不一定是「重理輕文」,君不見高行健得奬後,港人亦忽然吹捧文學起來。但,只是一殺那。

你講出了一重點,「巿場價值」,我們太習慣把每件事物都跟巿場價值掛鈎,由我們這一代人開始,已漸漸失去自我,而我目睹的下一代人,漸漸不懂得何謂快樂。

kickin8:
不肯吃苦頭?!真的是這樣嗎?我見阿sa和阿嬌吃了很多苦頭,仍然堅持當明星啊!我又見身邊的同事們早上五時上班,零晨一、二時下班,仍然堅持著這份收入微薄的工作。

你知道嗎?沙士那段時期,出現過薪金低得可憐的情況,三千元港幣月薪,做office assistant,要日曬雨淋。仍有很多年青人爭著做。

Galileo:
:) 沒錯,我正是指這一種廣告。每一次我進csb的網頁都很是氣餒,我常想:假如我有十年經驗加十八般武藝,仍須投考一份五位數字月薪的工作,何其悲哀!

James:
我都不是行內人,Junior IT support都如此多要求,如果senior的話兩頁紙都寫不完。

Kris:
創業並不能只靠腦袋,還須有無比驚人的毅力和努力,加上天時地利人和,自問沒有創業的靈活頭腦及毅力,只好向現實低頭。不得不提,現今世界裡存活,識人分分鐘好過識字啊!

Leona:
一直認為這個社會很荒謬。
曾經數度懷疑自己有何價值,找工作時,不斷閱讀這種廣告。發現很多,我都不符合要求。但我明明是正統學校畢業,怎麼工作需要的技能,我卻一樣都不懂。倉頡打字是我在暑假裡學會,在大學時玩icq操練出來的。fireworks/dreamweaver/frontpage是做it support的朋友教我的,word和excel是邊工作邊用邊學的。說來慚愧及好笑,三合一有scan function的影印機和fax機是出來工作後才學會!!我會想,香港到底有多少高分低能的人????

匿名 說...

識Notes Development仲做Junior?
係香港做Support,真係超人來.

講起工作技能,我係好佩服理工,整個Prefered Graduate計劃,基本上係保留理工作為Technical Institute功能,同埋提供勞工畀校董試用.

馬國明係迎新日時,第一句就指有同學想來增值,係貶值自己價值.今日社會,比馬克思生存的年代更會控制,已經成為Mindset.

匿名 說...

小汀:

政府不嬲都係"痴心一片",有咁好經驗走去做政府?妳估做司局長,真係為咗個理想?

Daniel不才,只係一個邊打工邊讀U的中年人.但我夠膽講,香港自上世紀八十年代炒賣風一起,已經正式玩完.我不是危言聳聽,如果香港Gini co-efficient現在已經去到0.551,距離盧旺達這條死路還會遠嗎?不明白說甚麼?請自行看大崩壞~~~~~~:)

匿名 說...

「增值」兩個字,唔見猶可,一見扯火...近年講笑,都成日自嘲「人肉八達通」也。

最痛苦者,係(1)「增值」似強姦多於侷賭,冇得 opt out (除非唔介意「冇出息」呢啲 label);(2)殺雞用牛刀,要用發財上位嘅氣力工夫,求餬口吊命嘅清茶淡飯。

冇得揀、高 input (Galileo 兄 illustate 咗)、低回報 (講真,有冇可能有 300 萬個高盛 VP 響香港行來行去?),唔係無其他路數,真係搵鬼繼續坐呢條賊船喇。

Justin 說...

Editgrid裏面有人,係勁到Ibank出三萬幾蚊糧請佢地都唔做,寧願錢少少而做自己覺得好玩既野。

我好欣賞佢地公司。

C 說...

Galileo:
就算唔係超人,都係萬能俠。
已不止是it,以往最multi-tasking的工作叫秘書,刻下任何一種工作都multi-tasking得過份。我曾面試過一個秘書職位,對方要求我清洗魚缸及煲老火湯!!

很同意你提及的馬克思主義思想。被剝削的人還要不斷剝削自己,走去增值。

Daniel:
為理想而工作,終歸乞食。上兩代的人教我們,理想還理想,工作還工作,不一定對立,但不要奢求並存。

香港是否已死,又,會否死過返生,就讓時間和歷史見証吧!

Perennial_Loser:
超級認同你這句:「殺雞用牛刀,要用發財上位嘅氣力工夫,求餬口吊命嘅清茶淡飯。」
我不明白為何只需中五程度便能勝任的客戶服務代表,可以招徠一班持有PhD,Master或double degree的人來申請。這班人唸書唸壞腦麼????問他們知不知道自己想要甚麼,竟也含糊了事,就像為了找工而敷衍我。

每次interview的時候,真的嘖嘖稱奇。

Justin:
「寧願錢少少而做自己覺得好玩既野。」令人佩服!我身邊很缺乏這種人。

匿名 說...

小汀︰

hi, 我是第一次留言的。
看到你寫招聘廣告內容,不禁想起前幾天看到某大會計行請risk mgt manager的廣告,其中一個要求是positive "can do" attitude. 不禁覺得現在雇主請人不單止要你十八般武藝樣樣齊,還要有完美性格,真似找對象長相廝守囉!

Kris 說...

risk mgt manager...哈哈哈!
"can do" attitude 本來算有,逐漸消磨中。

暗黑的卡夫卡 說...

sherry:

Wheres the ad? is it online? I CAN DO anything!

If they CAN hire me I mean...they CAN right?

To me its just...buzz words for us poor suckers...

小汀:
正如Galileo所說...被剝削的人民站起來!不原做奴隸的人們!香港需要馬克思主義! =_='

老實講﹐香港已經連續十五年在經濟自由度指數榜上排名第一﹐and thats laissez faire capitalism - or unrestricted capitalism. And we all know it sucks for the working class!

匿名 說...

小汀 提到...
Daniel:
為理想而工作,終歸乞食。上兩代的人教我們,理想還理想,工作還工作,不一定對立,但不要奢求並存。

香港是否已死,又,會否死過返生,就讓時間和歷史見証吧!

妳就是再點中問題所在,但政府以為可以馬兒好而不用吃草噃,D~~~~!

妳說的對,時間和歷史是最好的見證.不過Collapse一書應該用,可強化危機意識!

匿名 說...

社會主義/共產主義衰咗,係在於 in overall terms 佢係違反人性 (完全抑制貪念/「大公無私」);但反過嚟講,laissez faire capitalism 就係肆無忌憚咁叫人 amplify 私慾/貪念,貪就係「硬道理」,響唔干犯現存法律嘅情況下,「貪」同「唔貪」係一個 choice,唔涉及道德問題,甚至更極端啲嘅會講「貪」係「進步」之源,應該鼓勵。簡單講,就係縱虎行兇。華人社會(唔止香港),老虎橫行,仲要「屁股摸不得」,大家有眼見。

唔敢話要全面搞社會主義(我唔想行出街畀人貼「左仔」label 再拉埋一角毒打);但睇返北歐嘅例子,甚至係新加坡(!!!),經濟/民生政策中包含適量社會主義成份,反而可以有防腐劑/隔火層嘅作用,維持社會穩定。香港嘅公屋政策,亦未嘗唔係帶有極重社會主義色彩,政策對解決(部分)社會同經濟問題嘅功用,有目共睹。試諗下咗公屋政策嘅香港,四圍都係鐵皮屋貧民窟,同里約熱內盧差唔多咁,仲會唔會有今日咁「風光」?

宜家華人社會 neo-liberalism 大行其道,將 laissez faire 同個人主義掛鉤,光明正大咁講「你死你事」之餘,仲要打擊 (1)public sector 同 (2) 集體力量 (大家可以留意啲 neo-liberals 對「工會」、「集體」、「公眾」呢啲概念有幾歇斯底里),結果必然係個人陷於單打獨鬥,最終一係:

(a)由弱至強咁玩「大逃殺」死剩最後一個,或

(b)弱者投降認命 (真係「通往奴役之路」,嘿),再唔係就

(c) 終於有人頂唔順,又嚟黃巢李自成。

以上是但一隻,都係咁大鑊。香港會係呢三隻之中嘅邊隻,我真係冇膽估...

話時話,其實相信 laissez faire 資本主義嘅人有個好大盲點,係佢哋平日可能完全冇留意,下次再講...

匿名 說...

Re: Kris

想創業嗎?我可以俾個活生生的例子你。今時今日,一個大學畢業生,出來廿幾歲,除非你老豆好把炮,識好多人,個個見你都叫聲細侄,唔係就算你勁到曉飛,都冇人睬你。

容我竄改杜汶澤之前一句:有關係但冇實力,人地最多睇唔起你;有實力但冇關係,人地直頭睇唔到你。

以前聽人講,男人三、四十先好去創業,我以為係因為到時人生經驗豐富,經得起風浪,EQ夠高,懂得進退法度。但其實係,要等到你步入中年,你識得的同學裡應該發達的都發了,應該坐上管理層位置的都坐了,你才可以去拉關係。靠食關係,你盤生意先有得做。到時候,你有冇實力、仲做唔做得野、仲有冇心去做野,都係其次。

C 說...

Sherry:
:) Hi 歡迎~
好一個can do attitude,見過一個廣告,除了can do外,還列明"one foot kick"!!我第一次見到這樣的招聘廣告,在家裡笑彎了腰。妳提起"長相廝守",我正好也在想,我們這一代對工作(事業)的忠誠度有多高?

kris:
我則坦白地承認我沒有can do attitude。
某些工作,我一定做不來,要我像地產界精英在地鐵站外不斷攔截陌生人找生意,我不行。

卡夫卡:
哦,是嗎?那麼我誤會了。-_-"

匿名:
對這一句「政府以為可以馬兒好而不用吃草」有保留,假如把政府二字改為商家或僱主,同樣可行。本人並不針對任何一個sector。

Perennial_Loser:
過猶不及,中庸之道,才是上策。
完全社會主義/共產主義或完全laissez faire 資本主義,都有問題的。

社會主義會製造出「做又36,唔做又36」的懶人,會退步亦是事實。資本主義又製造出嚴重剝削、不公平的現象。

我認為,打擊public sector係97後先出現的情況喎,至於集體力量,「紮鐵」事件都反映出港人好支持集體力量,也並非一味打壓的。

匿名 說...

卡夫卡:
昨日許寶係明報有文章,指整個經濟自由度指數極有問題,可以一看。

Perennial_Loser:
上次同一班同學食飯,邱禮濤話中國下次暴動隨時係因為股市,尋日中央台竟然講出「股民要學習股市有沒動,並非持續向上」,都不無可能...

小汀:
「在地鐵站外不斷攔截陌生人找生意」,我做過幾次,更煩是在地鐵站內捉人,還真不是我那杯茶。

紮鐵佬一事,後來細想若非集體談判權仍在,何以造就此事。老世仍然視工會為洪水猛獸(但工聯會又唔係喎!),工人又並非真係咁團結(有親戚寧願無工開都唔去支持),整件事真係歷史的偶然。

Kris 說...

>社會主義會製造出「做又36,唔做又36」的懶人,會退步亦是事實。

呢個唔好咁肯定喎。中國式「社會主義」根本就唔係社會主義...是否會製造出懶人,有待定斷。

支持集體力量的,係一班工人+工會,我會話唔可以扯上「港人」身上,有好多人冷眼旁觀,「睇你班地盤佬幾時玩完」咁。而且要加插一句:傳媒為扎鐵工潮製造大量片面報導既假象,如果唔係親身接觸/參與事件,未必會清楚成件事係點,知道所謂不公義的地方。就算你支持工潮,都可能只係為支持而支持,唔知發生咩事。

「在地鐵站外不斷攔截陌生人找生意」嘛...我諗我做得黎喎。因為我連係中大周圍走,幫報社攔截陌生人派調查報告+套都做得出...

匿名 說...

Perennial_Loser 提到...

(a)由弱至強咁玩「大逃殺」死剩最後一個,或

(b)弱者投降認命 (真係「通往奴役之路」,嘿),再唔係就

(c) 終於有人頂唔順,又嚟黃巢李自成。

以上是但一隻,都係咁大鑊。香港會係呢三隻之中嘅邊隻,我真係冇膽估...

我有膽估,先b後c~~~~~~:)

Daniel.

匿名 說...

小汀 (唔「姐」你嘞...好似怪怪哋咁):

「取乎其中」,你講啱咗;此所以我會形容左派思想至少有一定嘅「防腐劑」作用。如果以北歐嘅個案睇,配合適當嘅民族性 (或者 neutral 啲叫「族群行為模式」),左啲嘅政策甚至可以超過「防腐劑」而升級做「調味品」,對社會/經濟發揮正面作用。只係以華人社會嚟講,始終係走向極端,「大鑊飯」衰咗就重返「有錢大叉晒」,仲要變本加厲;「執中用允」,似乎都係諗下就好,唔好望會有呢一日。

「做又三十六,唔做又三十六」,呢個確係以前見到實行社會主義/共產主義國家嘅問題;不過時至今日,返工蛇王、對工作冇熱誠/歸屬感,甚至寧願中六合彩/炒股處錢提早退休嘅情形,其實響平庸嘅一般人(即係田二少幾年前串過嘅"mediocrats",包括小弟在內)嚟講越嚟越 prevalent,都可以多少反映到資本主義下個 incentive system 開始有裂痕 - 多勞多得失效、收入增長追唔上支出所需、物質/享受「有得睇冇得食」或已經飽和唔再需要、個人能力要求不斷提高而勞力回報增長停滯(甚至倒退),etc.,都係逐步蠶食緊社會。共產主義嗰隻養懶人,都仲易啲解決;但當「動之以利」嘅資本主義都開始失效,點樣止血似乎係更大嘅難題。大膽啲講,去到呢個地步,或者 think beyond "progress/development" as we used to know 先會有出路。

至於打擊 public sector,你講得冇錯,明顯出現呢種傾向係 97 之後嘅事 - neo-liberalism 響國際輿論界越來越紅,都係90年代中後期嘅事。不過香港個 case,其實都係事態成熟後出現嘅「果」;實際上回歸前只係經濟旺,各大 stakeholders 尚算可以各取所需,對 public sector 嘅嘢先至容忍唔出聲 (eg. 綜援、公屋、公務員體系)。一向以來,public sector 都係被視為次等嘢 (eg. 七八十年代大學生,視打政府工為「冇出息」;一般人對政府服務諸多詬病);去到回歸後出現經濟危機,個餅細咗,資源唔夠分配,一直潛伏嘅問題終於爆發,public sector 即刻由「可以容忍」嘅次等嘢變成十惡不赦嘅負累,其實係理所當然嘅發展。此外香港人嗰種 knee-jerk 反左心態同埋所謂嘅「自力更生」精神,本來就潛在演化為反 public sector 嘅可能;回歸後時勢一轉,阿松之流唱幾句「獅子山下」,雷鼎鳴呢啲「權威」再加幾句,生米即昤變熟飯。只係歸根究底,冇「米」,又如何煮得成飯?

Galileo 兄:
根據上面「一放就亂,一亂就收,一收就死」嘅往績,配合埋時下中國人「人為財死」嘅心態,買定花生等睇戲都得 - 即使臺戲最終做唔成(阿爺嘅老拳唔係流嘢),花生都可以照食。

Kris 兄 (兼答小汀):
集體力量響市面上有幾大力量同支持,人言人殊;不過睇睇日出康城追爛帳班工人,次次都響電視新聞畀人媽叉「你班友做乜阻住條路」,多少都可以見到個勢係點。

宜家只係經濟轉型下情況惡化得好明顯,有部份市民自己都身受其害,又或者睇唔過眼,先叫做好似多咗人開聲支持下呢類集體力量嘅行動。之不過睇返早兩日《蘋果》何民傑居然可以將工會同黑社會相提並論(條友真係當香港啲工會好似美國 Teamsters 嗰啲咁;更唔好提以現今商業機構嗰種拎「股東利益」同「公眾利益」(!!)做面,加相對壓倒性資源做底去屈機嘅「議價」方式,歃血為盟打爛仔交「同佢死過」係有一定嘅合理性),主流傳媒輿論冇 uproar,都真係...嘿!

匿名 說...

Perennial_Loser:

打擊Public Sector是NPM或Reinventing Government的重點嘛,原來係UK,AU,NZ及US開始,因為太多事業都係'阿爺'.

香港所以會推行嘅原因有爭議,有話關Asian Financial Crisis事,但有人話係香港無Universal Suffrage事~~~~~~:P

Daniel.

C 說...

Galileo:
對,你提及的老細怕工會或工人團結,這個情況一直都是。假如工人夠團結,無人頂爛巿,何來會被壓價?又何來出現如此苛刻的招聘廣告。現在的老細心態多半認為你一個人不做,大把人爭著做。又或心想:瞧你們有多團結,你不吃飯,家中幼小都要吃的!結果,工人很難團結起來的。

Kris:
世事當然無絕對,不過我還是傾向相信缺乏競爭和原動力的社會是會製造出懶人。

>>>有好多人冷眼旁觀,「睇你班地盤佬幾時玩完」咁

又未至於咁誇張,不過紮鐵事件一出,有不少安坐辦公室的人士,惠晉帝上身,在blog裡所寫的文章,有不少悻悻然地道:他們上街罷工,是因為工作環境太惡劣,何不添置冷氣...等等。看得我眼火爆!

Perennial_Loser:
同意你回應我的那一部份。除了看到「動之以利」的失效和毛病外,更重要是想了解,為何現今的人會「返工蛇王、對工作冇熱誠/歸屬感,甚至寧願中六合彩/炒股處錢提早退休」,及何時開始我們變成這樣,這又跟我們不同年代的人有關嗎?

匿名 說...

Daniel 兄:

之前個三揀二,如果係要我自己估,我會估 (a) 同 (b)...香港人邊有骨氣玩 (c) 吖...

你提到紅毛嘅經驗,幾有趣...有時諗下,又難怪有啲人會串啲紅毛「唔熟悉中國國情」;佢哋只知響英美澳紐加親眼見到乜都阿爺會低效率同浪費資源,但就冇辦法想像到全人類「大私無公」可以有幾恐怖;上面啲毛髮豉油、車胎橡皮糖,啲紅毛聽見唔係唔識驚,但佢哋始終冇辦法 connect 到,當某啲人嘅行為模式欠缺某啲特質,「自由市場」真係會死人。楊懷康雷鼎鳴呢啲平日聲大大,其實呢...嘿~

小汀:
工作熱誠低落,同世代問題又唔算係有好直接關係,但間接咁睇又關係唔細。

簡單講,部分第二代精英食到大勢,短短二三十年間去到魚翅撈飯嘅地步,得意忘形之下,一則睇任何事都太輕易,二則食憤玩慣使慣,兩者結合,再加埋經濟轉型,就造成今日嘅問題:一方面以消費/物質決定身份,所有人就死追爛追;但追追下,靠每日打份工又追唔到,反之仲要職業穩定性日降,連飯碗都不保,日益依靠(1)「增值」同(2)「做爛市」(加長工時、人工增長落後)去捱,所以多咗人有「發達要快又要早」嘅「覺悟」。由七十年代第一次炒股狂潮開始已經係咁;後來經濟越趨向 tertiary 、知識型同轉變快,個 trend 就越明顯。呢啲其實都係好正常嘅心理反應。

經濟同生產模式,決定工作嘅心態同行為表現;high turnover, high growth, short cycle,統統都係令人心理上 焦慮不安。一班焦慮不安嘅人,即使佢表現出嚟好專注努力做一樣嘢,個底其實都只係 fear-driven,根本唔會有咩 dedication 可言。對照返殷海光個「金字塔」,香港人響 fight for survival/material wealth 呢個 level 越踩越深,「熱誠」「歸屬感」呢啲「高卡」嘢,睇怕只會離我哋越嚟越遠...

匿名 說...

Perennial_Loser 提到...
Daniel 兄:

之前個三揀二,如果係要我自己估,我會估 (a) 同 (b)...香港人邊有骨氣玩 (c) 吖...

你提到紅毛嘅經驗,幾有趣...

關於三揀二問題,你可以看血酬定律.

如果有讀PA,一定要識.啲人未覺悟之前,都會以為NPM或Reinventing Government係荊山之玉,靈蛇之珠!:P

Brian 說...

社會流動性萎縮,是香港的最大隱憂。但除了我們這班年青人,政府及社會大部分似乎都看不到這個問題。